D Poscht schtrafft ihr’s Filialnetz und landuf, landab werded Poschtstelle gschtriche oder in Agenturen ungwandlet. Was esch für Wettige z erwarte?
Z Wettige hets drü Poschtstelle und es esch numme e Frog vo de Ziit, wann d Reduktion vom Filialnetz au ois trifft. Nach ere Karte vo de Gwerkschaft Syndicom sind d Poschtstelle a de Schtaffelstrass und de Bahnhofstrass gfährdet, während di a de Seminarstrass würdi witer bestoh. Uf de andere Site gits en Gstaltigsplan von de Gmeind fürs Bahnhofareal, wo en Abriss vo de Poscht a de Seminarstrass vorgseh esch. Wil ois en Mieter, vom Nachbargebäud, wo au de Poscht ghört, mitteild het, dass er mündlich informiirt worden esch, dass d Gebäud im 2020 abgrisse werded, hend mir bi de Medieschtell vo de Poscht z Bärn aagfröged, wi es mit di Poschtstelle z Wettige witergoht.
De Mediesprächer Markus Werner het ois über zwei Pünkt Uskunft geh. Zum erschte esch di Lischte von de Syndicom ohni Rücksprach mit de Poscht zustand cho, so dass d Poscht nöd weiss, welli Kriterie d Grundlag vo de Lischte esch und si deshalb au nöd kommentiirt. Zum zweite esch d Poscht im Gschpröch mit em Kanton Aargau und wird no em erschte Halbjahr 2017 e Lischte vo Poschtstelle veröffentliche, wo unverändert bliibe. Das heisst bis Endi Monet müesste mir meh wüsse.
Wettiger Nochrichte 