De muetmasslich Bankräuber isch gfasst!

In ere Mediemitteilig informiirt d Kantonspolizei (Kapo) püber d Feschtnahm vomene 44-jährige Italiener. Er wird dringed verdächtiged, de Überfall uf d UBS-Filiale a de Landstrass verüebt z ha.
De Tatverdächtige, so schriibt d Kapo in ihre Mitteilig, isch geschter, 6. Juli 2017, gege Mittag verhaftet worde, nachdem er ere Patrouille wege sinere unsichere Fahrwiis im Bözbergtunnel ufgfalle isch. Er het Kokain bi sich gha und mehreri hundert Franke Bargeld.
Als muetmassliche Täter uf d Schliche cho isch ihm d Polizei durch en Hiwiis vo de Swiss Casinos Züri, wo er in de letschte Woche mehreri Mali gsi isch.
Nebem Banküberfall z Wettig wird ihm au de Überfall uf en Tankstelleshop z Spreitebach am 27. Juni vorgworfe. D Staatsaawaltschaft Aargau het gege de Italiener ohni Wohnsitz in de Schwiiz es Strafverfahre eröffnet und bim Zwangsmassnahmegricht Untersuechigshaft beaatraid.

Advertisements