Am Sunntig sind es genau no acht Woche gsi, bis zu de Wahle vom Gmeindrot, em Iiwohnerrot, de Stüürkommission und de Schuelpfläg. D Plakat, wo jetzt ufghängt werde dürfe, züüged davo.

Am 24. September 2017 sind d Gsamternoierigswahle z Wettige. Di heiss Phase vom Wahlkampf het dadermit aagfah, dörfed doch acht Woche vor de Wahl Plakat gstellt werde. Di meischte Partei dörfted davo scho Gebruch gmachd ha (genau wüssed mir es nöd, wil all oiseri Redaktore ortsabwesend sind).

E chli heisser dörft de Wahlkampf werde, wenn d Schuelferie vorbi sind. Dann wird’s au Infoständ und Wahlveraastaltige geh. Zudem veraastalted d glp am 30. August e Podiumsdiskussion mit de füf Gmeindrotskandidate (genaueri Infos chömmed no). Es Wahlpodium mit allne Gmeindrotskandidate, wo s Forum 5430 planed het gha, chunnt nöd zstand. De Marco Kaufmann, wo das Podium fürs Forum het welle organisiire, het dazu mitteild, dass de amtiirende Gmeindrat kein Bedarf für es settigs Podium würd gseh.