Konfirmandeklass vo Streckeunterbruch betroffe

D Bahnstercki zwüsche Karlsrueh und Basel isch sit geschter, Samschtig, 12. August 2017, unterbroche. Au Wettiger sind davo betroffe, zum Bischpil d Konfirmandeklass vom Pfarrer Lutz Fischer-Lamprecht.

Bi Arbeite am Rastatter Tunnel südlich vo Karlsrueh hend Arbeiter en Erdrutsch usglöst, wo d Gleis schwer beschädiged het. Damit isch di wichtigscht Bahnverbindung zwüsche Dütschland und de Schwiiz unterbroche und wird – so teilt di Dütsch Bahn mit – für öppe sibe Täg unterbroche bliibe. In de betroffene Bahnhöf isch es zimlichs Chaos usbroche und de Schineersatzverkehr het bisher schints numme en Bruchteil vo de Passagiir chönne transportiire.

D Konfirmandeklass, wo uf de Hallig Hooge im Lager gsi isch, het geschter z Hamburg de Nachtzug uf Züri gnoh und het welle hüt am Morge z Bade welle usstiige. De Unterbruch vo de Strecki het de Planig en Strich durch d Rechnig gmachd. De Nightjet isch grossrüümig über Münche-Innsbruck-Bludenz umgleitet worde, so dass di Reisende immer noch unterwägs sind (Stand 10:40 Uhr) und statt em Nüni am Morge wohl nöd vor de Eis am Namittag werde dihei si.

Liebi Läserinne und Läser, isch au vo oich öppe betroffe? Wend er ois verzälle, was ihr erläbt hend? Dann melded oich uf Facebook, Twitter oder mit eme Mail an wettigernews(at)gmail.com.

Update vom 14. August 2017: D Könfis sind um 13.39 Ihr diheime gsi und hend damit fascht föif Stund Verspötig gha.
Hiir no es Interview vo unterwägs, wo de Lutz mit eim vo de betroffene Schüeler gführt het:

Advertisements