De Schnee isch schints numme kurz bi ois, aber bsunders geschter hend ihr sicher Glägeheit für schöni Föteli gha. Vilicht chunnt ja vor em Jahresänd au no einisch Schnee.
Sit zwoi Johr bstimme mir jewils es Föteli vom Monet und das wend mir au für de Dezember 2017 so handhabe und zwar wider emol in Form vomene Fotiwettbewerb. Bis zum 31. Dezember um Zwölfi am Mittag chönd ihr ois e Winterfoti schicke (per Mail, uf Twitter oder Facebook), wo oich bsunders guet gfalld.
Mit em Schicke an ois stimmed ihr zu, dass mir d Foti dörfe verwende und bestätiged, dass allfällig abbildeti Persone mit de Nutzig vo de Foti durch ois iiverstande sind. D Foti muess im Dezember 2017 ufgnoh worde si und zwar entweder uf em Gmeindsbann vo Wettige oder me muess öppis vo Wettige druf gseh.
Mir drü Redaktore sind d Jury und d Siigerfoti wird s Föteli vom Monet im Dezember 2017 und als Priis gits eine vo oiserne exklusive USB-Sticks (mit 8 GB). D Bestimmig vo de Siigerfoti wird di letscht «Amtshandlig» vo oiserm Redaktor Markus Haas si, wo ja wege sinere Wahl in de Gmeindrat us em Redaktioreteam usscheide wird.
Wettiger Nochrichte 