Abschiid im Mittelpunkt

Bi de Iiwohnerrotssitzig vo geschter hend d Abschiid im Mittelpunkt gschtande. Aber au für di reguläre Traktande het sich de Rot di notwendig Ziit gnoh.
Am Donnschtig, 14. Dezember 2017 isch de Iiwohnerrot zu sinere letschte Sitzig vo de Legislatur zämme cho. Wer gmeint het, di ordentliche Traktande siged schnell erlediged, het sich girrt. D Kreditabrechnig für d Planig vo de Saniirig vom Tägi isch schnell aagnoh worde, d Fraktione CVP, SP/WettiGrüen und EVP/Forum 5430 hend sogar uf es Votum verzichtet. Meh Zit hend dann di beide Poschtulat bruuchd, wo de Gmeindrot beidi het welle entgegeneh. Das vo de BDP zur Förderig vo Verei, wo bi de Integration vo Flüchtling helfed, isch dann vo de Bürgerliche Parteie zrückgwise worde. Das zu de Definition vo Fraktione isch usführlich diskutiirt worde und, bsunders vo de glp, aber auch de SVP, abgelehnt worde. D Überwisig het letschtlich aber e solidi Mehrheit gfunde.

Wil d Antworte uf di drü vorligende Interpellatione schriftlich vorglege het, het de Gmeindrot jewils uf e mündlichi Stellignahm verzichtet und so isch de Rot dann zu de Abschiid cho: Frau Vizeamme Antoinette Eckert und Gmeindrot Daniel Huser sind sowohl vo Gmeindamme, wi vo ihre Fraktione geehrt worde, für ihri langi und intensivi Arbet. De Iiwohnerrotspräsident Paul Koller isch ebenfalls in de “politisch Ruhestand” verabschiided worde. Di letscht Iiwohnerrotssitzig isch es geschter au für de Roger Scherer, de Mario Häusermann, de Hans Brunner (alli SVP), de Michael Merkli (FWW), de Jürg Meier Obertüfer (WettiGrüen) und d Mia Gujer (SP) gsi, wo d Widerwahl verpasst hend und de Martin Spörri (BDP), wo nüm aaträte isch. Au verabschiided worde sind d Iiwohnerröt Markus Haas (FDP) und Sandro Sozzi (CVP), wo in Zuekunft als Gmeindröt a de Sitzige vom Iiwohnerrot werde teilneh.

Advertisements