D Büs vom RVBW, wo in de Stosszite vo Würelos über Wettige uf Bade fahre, hei hüfig Verspötig. Das ligt an zwei ümstände, wo de Effekt dütlich spürpar mache, wenn si zämme chömmed. S eini isch d Barriere z Würelos, wo sicher scho vilne vo oich Nerve koscht hei. S zweite isch de Stau uf de Landstroos, wo sich im Fiirobeverkehr nach de Furttalchrüzig Richitg Wettige bildet. De Kanton wot das Problem vo de Verspätig vom ÖV mit ere eigede Busspur löse. S Badener Tagblatt schriibt imene Online-Artikel, dass de Kanton zwüsche de Iimündige vo de Lugibachstroos und de Otelfingerstroos in d Landstrasse e dritti Fahrbahn wot baue. Will uf de Site Richtig Sulperg kei Platz isch, wird d Stroos uf de Site Richitg Tägi planed. De Bus söll di mittler Fahrspur übercho und bi de Iimündig vo de Otelfingerstroos wir e Lichtsignalaalag baued, wo de Bus wird bevorzuge. D RVBW und de Kanton hoffed, dass d Büs so ihre Fahrplan besser chöi iihalte.
Zäme mit dem Projekt planed d Gmeind d Kanalisation im Berich Oberi Geisswiis/Chrüzkapellewäg z saniire, was zu einige Synerdie wird führe. Über de Kredit in Höchi vo 260’000.- Franke für d Kanalisation wird de Iiwohnerrot in sinere Sitzig am nächschte Donnschtig, 28. Januar 2016 entscheide.
Es git au es Video zu de Meldig:
Wettiger Nochrichte 