Kampagne gege d Yvonne Feri?!

S Badener Tagblatt säht in ihre Online-Usgab Zwifel a de Führigskompetenze vo de Yvonne Feri. So kurz vor de Wahle erinnert das a d Kampagne vom FBI-Chef James Comey, wo de Hillary Clinton vilicht di entscheidende Schtimme oscht het.

Öppe e Woche vor de Präsidentschaftswahl in de USA het de Chef vo de Bundespolizei (FBI) vo noi entdeckte E-Mail brichtet, wo Zwifel a de Integrität vo de Hillary Clinton ufgworfe hend. En Tag vor de Wahle het s FBI zwar Entwarnig geh, aber z spot, wi s Wahlergebnis zeigd.

Jetzt wird d Yvonne Feri e Woche vor de Regiirigsratswahle vorgworfe, en vertraulicher Bricht würd ihre Unfähigkeit in ihrem Amt als Sozialvorsteherin beschinige. Für d Kandidatin e schwirigi Situation, dörf si doch en vertrauliche Bricht nöd öffentlich mache, was widerum bedütet, es isch im Prinzip unmöglich, d Vorwürf z widerlege.
S Badener Tagblatt stützt sich bi sine Vorwürf uf Ussage vom Präsident vo de Wettiger Finanzkommission (Fiko), em Christian Wasmer, wo im Protokoll vo de Iiwohnerratssitzig vom 20. Oktober 2016 mit de Wort «erschütternder Befund» und «Führung komplett versagt» zitiirt wird.

D Vermuetig, dass es sich um e gezilti Kampagne gege e eim unliibsami Person isch, isch nöd abwegig. Mir hend e chli recherchiirt und sind uf folgendi Hiiwiis gstosse:
– Wi mehreri Iiwohnerratsmitgliider unabhängig von enand säge, isch es offensichtlich, dass de Christian Wassmer es persönlichs Problem mit de Yvonne Feri het. In de Protokoll vom Iiwohnerrat chönnt me zig Bispil nachzläse, wo das zeiged.
– Schpöteschtens sit em letschte Donnschtig hend mir in de Redaktion vermehrt Hiiwiis übercho, dass «in de nächschte Täg» dütlich würdi, dass d Yvonne Feri d soziale Dienscht nöd im Griff hetti. D Vorwürf als solchei stöhnd nämli scho länger im Ruum. Aber dass si grad jetzt chömmed, so kurz vor de Wahle, wo es kaum möglich schint, si in dere kurze Ziit z widerläge?!
– Aargauer Zitig/Badener Tagblatt versueched sit Woche d Kandidatur vo de Maya Bally z stütze.

Uf de andere Site git es  Hiwiis, dass a de Vorwürf nüd dra isch. De zitiirt Bricht isch nämlich uf Aatrag vo de Yvonne Feri vom Gmeindrat gnehmiged worde. Und wi cha e Sozialvorsteherin ihre Verwantwortig besser grecht werde, als in de schwirige Situation nach em Weggang vom Leiter vo de Soziale Dienscht, en Bricht vonere externe Stelle z verlange?