FC Wettige esch em Ufstiig en guete Schritt nöcher cho

Am Samschtig, 3. Juni 2017 het de FC Wettige sis zweitletschte Heimspiel in dere Saison bestritte. Im Alteburg hets zu eme knappe Siig gäge de FC Koblenz glanged.
Fuessballerisch het de 2-Liga-Match zwüschem FC Wettige und em FC Koblenz langi Ziit nöd chönne überzüge. Beidi Mannschafte hend nervös und teilwiis unkonzentriirt gwirkt. Päss si hüfig nöd det aacho, wo si hend selle und je witer d Spiilziit Richtig Ändi gange esch, desto hektischer esch es uf em Platz zu- und hergange. Unnötigi Fouls, sich Falle lah ohni mit em Gegner Körperkontakt gha z ha und ähnlichs het zuegnoh. Positiv ufgfalle esch vor allem de Pierre Gattiker, vo hinte links verlässlich in de Abwehr gstande esch und au vili Impuls nach vorne geh het.
So unansehnlich de Match zwüschedurch gsi esch, so nachvollzihbar esch es gsi, het doch de zweitplaziirt Klingnau am Fritig z Aarau scho 3:0 gunne gha und esch numme no ein Punkt hinter Wettige gsi. De Druck uf de Mannschaft esch so mit höch gsi. Es het en Siig bruuchd, um de viir-Punkt-Vorsprung halte z chönne.
Während vili Fans sich scho mit eme Unentschiide hend welle abfinde, het de Fanclub nöd ufgeh und au in de Nachspiilziit d Mannschaft no aatribe. Au d Spiler hend sich no nöd welle gschlage geh. Di Hartnäckigkeit esch letschtendlich belohnt worde.  In de Nachspilziit het de Leivin Keller en Freistoss zum 1:0 chönne verwandle. D Froid bi de Mannschaft und de Fans esch riisig gsi.
Am Mittwoch, 7. Juni tschutet de FC z Köllike und am nächschte Samschtig, 10. Juni 2017 hoffed mir nach em Match gege de FC Aarau 1902 uf en Ufstiigsfiir in d 2.Liga inter im Alteburg!

Und hiir chönnd ihr s Goal aaluege:

Advertisements