Es isch einiges an Büetz gsi, wo de FC Wettige hüt het müesse leischte. Zum Schluss het de FC mit 3:1 gege de FC Aarau vorne gha und esch sowohl Aargauer Meischter wi au Ufstiiger in di 2. Liga interregional.
IMG_6188Eis vorweg: Hochklassig esch de Match, wo hüt am 10. Juni 2017 im Stadion Alteburg stattgfunde het, nöd gsi. Aber langi Ziit sehr spannend, so dass di 490 Zueschauerinne und Zueschauer uf ihri Choschte sind cho. De Match het lang uf «Messer Schneide» gschtande. Aber de Reihe noch: Wettiger het en guete Start verwütscht und öppe in de 24. Minute s 1:0 erziilt. Torschütz isch de Leivin Keller gsi, wo scho bim Heimmatch vor ere Woche bim wichtige 1:0 gege Koblenz s einzige Goal vom Spiil gmachd het gha. Noch vor de Pause het de FC Aarau dann zum 1:1 chönne usgliiche und zwar durch en unnötige Penalty.
Am Aafang vo de zweite Halbziit isch dann Aarau am Drücker gsi und de FC Wettige het sich nöd chönne beschwere, wenn si eis oder zwei Goal kasiirt hätte. Aber d Mannschaft het nie ufgeh und in de 76. Minute isch s Goal zum 2:1 für Wettige. Numme viir Minute spötrer isch s 3:1 gfalle und Wettige het somit alles klar gmachd.
Bim Schlusspfiff sind dann alli Dämm broche und Spiiler, Betroier, Funktionär und d Fans hend usglass gfiired.