CVP het nominiirt! De verlorni Gmeindratssitz sell de Sandro Sozzi zruckhole

Am Tsischtig, 30. Mai 2017 het d CVP in de Leueschüür ihri Kandidate für d Gsamternoierigswahle vo Gmeindrot, Schuelpfläg, Iiwohnerrot und Stüürkommission nominiirt. Nebem Gmeindamaa Roland Kuster goht de Sandro Sozzi ins Ränne um en Sitz im Gmeindrot.

Sandro SozziDass d CVP de im Februar 2017 bi de Ersatzwahle verloreni Sitz im Gmeindrat wot wider ha, esch vo Aafang aa s erklärti Ziil vo de Wettiger Ortspartei gsi. Hüt het d CVP bi de Nominationsversammlig Nägel mit Köpf gmached und nebem Roland Kuster au de Sandro Sozzi als Kandidat für de Gmeindrot nominiirt. Er het Jahrgang 1982, esch ghürote und het zwei Chind. Glehrt het er Bauschpengler und er het en Bachelor of Science ZHF in Umwältengineering. Mit em Markus Maibach und de Kirsten Ernst (beidi SP), em Daniel Notter (SVP) und em Lutz Fischer-Lamprecht (EVP) sind somit sächs Kandidate bisher bekannt. Au d FDP wird, so esch aazneh, mit de beide bisherige Gmeindröt Antoinette Eckert und Martin Egloff wider aaträte und au bim Philippe Rey gits bisher kei Hiwiis, dass er nümm wird kandidiire. So esch am 24. September 2017 mit mindescht nün Kandidate für sibe Sitz z rächne.

Au bi de Schuelpfläg portiirt d CVP ihri beide bisherige Behördemitgliider: Sowohl de Stefan Spiess wie au de Marcel Aebi treted wider aa. Nachdem au de Thomas Sigrist (parteilos) und d Hanna Läng (EVP) wider kandidiire, d SP bereits d Kristin Lamprecht als Nachfolgerin vo de Kirsten Ernst nominiirt het, d glp mit em Jürgen Maier ins Rennen goht und z erwarte esch, dass d FDP au beidi bisherigi, d Judith Gähler und d Désirée Mollet, nominiire wird, werded d Wählerinne und Wähler drüber entscheide, welli Partei(e) und welli Persone d Reduktion vo de Schulepfläg vo sibe uf füf Mitglider trifft.

Au d Kandidate für de Iiwohnerrot het d CVP nominiirt. Es esch e guet gfüllti Lischte mit insgsamt 30 Persone, davo acht Fraue. D Altersspanne ligd zwüsche 22 und 63. Nüm aaträte wird de Präsident vom Iiwohnerrot, de Paul Koller. Alli andere Iiwohnerröt stelled sich zur Widerwahl.

Advertisements